…А пачыналася ўсё ў 1973 годзе, са стварэння аркестра рускіх народных інструментаў, у якім на той час было 26 музыкантаў. Першым кіраўніком і дырыжорам калектыву быў Уладзімір Краснаярцаў. На працягу творчай дзейнасці з артыстамі працавалі вядомыя дырыжоры Мікалай Трошка, Алег Шапялевіч, Вальтэр Мнацаканаў, Сяргей Кафанаў... А ў 1998 годзе кіраўніком і дырыжорам калектыву становіцца Таццяна Дубоўская. Праводзіцца рэарганізацыя і ствараецца інструментальны ансамбль выкладчыкаў школы, з’яўляецца і сама назва — "Каданс". Аркестр папаўняецца новымі інструментамі, сярод якіх флейта, скрыпка, цымбалы, басгітара, ударныя, пашыраецца канцэртны рэпертуар. У 2001 годзе калектыў узначаліла нядаўняя выпускніца Беларускай акадэміі музыкі Юлія Жураўлёва. Агульнымі намаганнямі была падрыхтавана канцэртная праграма для абароны "Кадансам" звання "народны". Адбылося гэта ў маі 2004 года. З 2008 года калектывам кіруе таленавіты музыкант, выпускнік Беларускай акадэміі музыкі, артыст Нацыянальнага акадэмічнага народнага аркестра імя Жыновіча Мацвей Сяргееў.

 

Сёння ў аркестры шмат новых інструментаў, новых салістаў. Усе яны, як і асноўны склад калектыву, з’яўляюцца лаўрэатамі і прызёрамі міжнародных конкурсаў. Удзельнікі свята былі літаральна зачараваны прафесійным выкананнем "Кадансам" твораў беларускіх кампазітараў, прыгожым сола ў выкананні Ганны Шкурскай, Віталя Шкурскага, Святланы Ніцыпаровіч і іншых.